 Шинэ санаа, зөв үзэл цаг ямагт биднийг хөтөлж Идэр дээд сургууль маань залуу хүмүүсийн оргилуун хүсэл тэмүүллийн уулзах цэг болж ирлээ.
Өөрөөр сурцгаая гэж хэлэхдээ бид зөвхөн өөрийн сургуулийн төдийгүй харин Монголын дээд боловсролын нүүр царайг бүхэлд нь өөрчлөхийг зорьж байгаа билээ. Үүнийг жилээс жилд улам олон хүн ойлгон дэмжиж байгаа нь юутай сайшаалтай.
Хувийн секторын зорилго хувийн л байдаг гэсэн үзэл магадгүй өнөөдөр үеэ өнгөрөөж байж мэдэх юм. Өөртөө асар их далд хүчийг агуулж байдаг хувийн санаачлага бэрхшээл тэмцлийг даван туулж ухаажин хөгжихийн хэрээр нийгэмд үнэхээр хэрэгтэй зүйлсийг бүтээж, тэр хэмжээгээрээ, хувьсан ардчилагдах шинж чанараараа нийтийн шинжтэй болж байдаг билээ. Бид ч үйл явцын ийм өрнөлтөнд татагдан орсон. Цаашдын хувь заяагаа угтан тосоход, Монгол улсынхаа хөгжил, боловсрол гэгээрэлд чадах ядахаараа хувь нэмрээ оруулахад бэлэн байна.
Үе үеийн төгсөгч нартаа, эрч хүчтэй оюутан залуустаа, гадаад дотоодын олон түнш, найз нөхөддөө чин сэтгэлийн мэндчилгээ дэвшүүлж байгааг минь хүлээн авна уу.
|
|
